Auglýsing á fimmtu síðu Fréttablaðsins í morgun vakti athygli margra. Auglýsingin er á gulum bakgrunni og sjá má textann „Algjör bónus fyrir þau sem elska krónurnar sínar.“ Við hliðar auglýsingarinnar má sjá glitta í rassinn á Bónus-svíninu og Krónu-krónuna.

Fyrirtækið á bakvið auglýsinguna er Heimkaup sem samkvæmt nýjustu verðkönnun ASÍ er oftast með lægsta verðið á matvöru. Könnunin var framkvæmd þann 25. mars klukkan 11. Þetta mun vera í fyrsta skiptið sem Heimkaup er með lægst verð allra verslana.

Í Facebook-hópnum Markaðsnördar hafa skapast umræður um þetta uppátæki Heimkaups enda ekki oft sem fyrirtæki notfæra sér vörumerki samkeppnisaðila til að auglýsa sig. Einhverjir telja auglýsinguna afar misheppnaða og að þetta virki meira sem auglýsing fyrir Bónus lesi maður ekki allan textann. Einn segir: „Að nota lit og hluta úr logo-i samkeppnisaðilans finnst mér ekki töff. Pínu svona eins og baktala aðra til þess að upphefja sjálfa sig… Heimkaup er fyrirtæki og vörumerki sem hefur það mikið að bjóða að það á ekki að þurfa að vera á svona plani.“ Og annar segir „Hálf vandræðalegt bara…“

Ekki eru allir meðlimir hópsins ósáttir með auglýsinguna en einn segir það vera hressandi að „fá smá pönk í samkeppni á matvörumarkaðnum“ og taka fleiri undir þau orð. Annar segir: „Bara loksins komin samkeppni. Heimkaup er að gera geggjaða hluti í alla staði.“

Ljóst er að auglýsingin fellur misvel í kramið hjá fólki en flestir eru sammála um að ef þeir hefðu ekki gefið sér tíma í að lesa auglýsinguna þá hefðu þau talið að hún kæmi frekar frá Bónus.