Hack the Crisis, nýsköpunarkeppni, lýkur í hádeginu í dag. Um er að ræða stærsta stafræna hakkaþon sem haldið hefur verið hér á landi sem tæplega tvö hundruð þátttakendur tóku þátt víðs vegar úr heiminum.
Teymin í keppninni áttu að skila lausn í tvo flokka og alls bárust 128 lausnir. Samkvæmt fréttatilkynningu fór þátttaka fram úr björtustu vonum en skipuleggjendur hakkaþonsins voru Nýsköpunarmiðstöð Íslands, Reboothack og Fjármálaráðuneytið. Keppendur komu víðs vegar að úr heiminum meðal annars frá Englandi, Bandaríkjunum, Kína, Brasilíu, Danmörku, Egyptalandi, Mexíkó og Kólumbíu.
Verðlaunin í keppninni eru gefin af Atvinnuvega- og nýsköpunarráðuneyti, Heilbrigðisráðuneyti, Fjármálaráðuneyti, Reykjavíkurborg, Félagsmálaráðuneyti, Menntamálaráðuneyti, Island.is, CCP, Sambandi Íslenskra sveitarfélaga, Viðskiptaráði Íslands og Nýsköpunarmiðstöð Íslands.
Úrslit verða tilkynnt í beinu streymi frá Stúdíó Sýrlandi í hádeginu. Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, verður með opnunarræðu og afhendir verðlaun sem verða veitt fyrir fimm flokka:
Sigurvegarar í hverjum flokki fá 500.000 krónur í verðlaunafé, Design thinking hraðal og aðstöðu á frumkvöðlasetri þar sem sérfræðingar Nýsköpunarmiðstöðvar Íslands og Reykjavíkurborgar annast fræðslu, stuðning og eftirfylgni.
Skipuleggjendur vilja þakka þátttakendum fyrir frábærar lausnir og einnig þakka þeim sem fluttu fyrirlestra á meðan á keppninni stóð, mentorum og dómurum.
Þeir sem vilja fylgjast með verðlaunaafhendingunni geta gert slíkt á Facebook-síðu hakkaþonsins.
