Forstjóri flugfélagsins Play, Arnar Már Magnússon, segir félagið svo gott sem tilbúið til að hefja flug. Þetta kom fram í Morgunútvarpi Rásar2. Arnar segir að félagið stefni á að hefja flug í haust en sé þó tilbúið að flýta áformum ef þörf er á.
Ragnar Þór fór í heimsókn
Á dögunum bárust fréttir þess efnis að Ragnar Þór Ingólfsson, formaður VR, hefði heimsótt höfuðstöðvar Play og komið verulega á óvart hversu langt félagið var komið í skipulagningu starfseminnar og hversu mikill metnaður og drifkraftur var í teyminu. Ragnari var boðið í þá heimsókn í kjölfar þess að hann gaf til kynna að Play væri flugfélag sem myndi fela skattfé í skattaskjóli.
Arnar kveðst ekki skilja hvers vegna orðrómur hafi farið af stað um meinta notkun Play á skattaskjóli.
„Það er bara algjörlega óskiljanlegt fyrir mér, enda hefur það aldrei verið markmiðið,“ sagði Arnar sem kveðst feginn að sá misskilningur hafi verið leiðréttur.
Kjör til fyrirmyndar
Mikið hefur mætt á Icelandair síðustu vikur vegna hörku í kjaraviðræðum við þrjár stærstu flugstéttir félagsins, flugvirkja, flugmenn og flugfreyjur. En flugfreyjur hafa þar harðneitað að gangast undir töluverða kjaraskerðingu til að létta róðurinn með flugfélaginu.
Arnar segir ekki það sama upp á tengingunum hjá Play. COVID-19 ástandið hafi komið lítið niður á félaginu og frekar skapað tækifæri heldur en hindranir. Eins hafi Play nú þegar gengið frá samningum við stéttarfélag. Spurður út í kjör starfsmanna Play svaraði Arnar:
„Þau eru bara til fyrirmyndar, eins og Ragnar hefur séð. Við erum búin að semja við íslenskt stéttarfélag sem heitir íslenska flugstéttarfélagið sem var stéttarfélag flugmanna hjá WOWair og var mjög flott og reynslumikið fólk sem kom að þeim samning svo hann er eins bestur og á verður kosið.“
Stefna ekki á hærra miðaverð
Play hafi staðið í undirbúning starfseminnar í rúmlega ár og teymið samanstendur nú af 36 starfsmönnum sem allir hafi ástríðu fyrir flugrekstri. Á þessu rúmlega ári hafi þeim mætt margar áskoranir. Sumar stærri en aðrar.„Guð minn góður hvað við sáum ekki COVID fyrir.“
Arnar segist ekki endilega sjá fram á að hækkað miðaverð þegar flugferðir félagsins fari á sölu. Þeir starfi eftir ákveðnu viðskiptaformi þar sem miðað er að lággjalda flugförum og lágan kostnaðargrunn.
Hvernig sem fari með Icelandair þá sé Play tilbúið að grípa inn í og tryggja samgöngur til og frá Íslandi. Play sé búið að læra af mistökum WOW og eru bjartsýnir á framhaldið.
