Eins og landsmenn vita eflaust gengur snælduvitlaust veður yfir landið í dag. Veðrið verður einna verst á höfuðborgarsvæðinu, Suðurlandi, Faxaflóa og Suðausturlandi þar sem rauðar viðvaranir eru í gildi.

Vindraði í byggð var einna mestur í Vestmannaeyjum í nótt en klukkan fjögur var vindraði 35 metrar á sekúndu. Það eru tólf vindstig á gamla vindmælikvarðanum og jafngildir vindhraðinn 126 kílómetrum á klukkustund.

Í færslu sem lögreglan í Vestmannaeyjum setti á Facebook-síðu sína rétt fyrir klukkan sex í morgun kom fram að vindhraði klukkan fimm hafi mælst 43 metrar á sekúndu og 57 metrar á sekúndu í hviðum. Lögregla og björgunarsveitir höfðu sinnt 14 verkefnum klukkan 5.30 í morgun. Stóðu vonir til þess að veðrið færi þá að ná hámarki.

Samkvæmt þessu virðist óveðrið slaga í veðurhæðina sem varð í stórviðrinu í febrúar 1991. Að því er fram kom í færslu á Facebook-síðu Blika á miðnætti, sem veðurfræðingurinn Einar Sveinbjörnsson heldur úti, mældist meðalvindhraði á Stórhöfða þá 56,6 metrum á sekúndu. Í óveðrinu í desember síðastliðnum mældust 40 metrar á sekúndu í Vestmannaeyjum.

„Rétt er að hafa í huga að þokkalegt skjól er í bænum þegar er A-átt og mun lægri gildi vinds á mæli þar samanborðið við Höfðann,“ sagði á Facebook-síðu Blika.

Í frétt RÚV í morgun kom fram að búið væri að opna fjöldahjálparstöð í Vík í Mýrdal. Hún opnaði í gærkvöldi og á miðnætti höfðu rúmlega tuttugu manns leitað þar skjóls. Þá er rétt að vegfarendur hafi í huga að búið er að loka öllum leiðum til og frá höfuðborgarsvæðinu og þá ganga strætisvagnar ekki fyrr en óveðrinu fer að slota.

Hér að neðan má sjá gang lægðarinnar en eins og sést berlega á kortinu er um víðáttumikla lægð að ræða og gætir áhrifa hennar víða á norðanverðu Atlantshafinu.