Sólveig Anna Jónsdóttir, formaður Eflingar, gagnrýnir pistil sem birtist í Morgunblaðinu í dag. Höfundur pistilsins er Ásgeir Ingvarsson, blaðamaður á Morgunblaðinu, en titillinn er Til varnar Ebeneser Skröggi, en líkt og margir vita er Skröggur þessi söguhetja jólasögu Charles Dickens.
Líkt og titillinn gefur til kynna, þá er hinn umdeildi Skröggur varinn í pistli Ásgeirs. Þeir sem að þekkja til jólaævintýrisins vita að boðskapur sögunnar er að níska og græðgi geti kannski veitt manni peninga en ekki hamingju. Ásgeir segir að Skröggur sé misskilinn og heldur því fram að án fólks eins og hans væru jólin eins og á 19. öld. Sólveig er ekki sátt með þessi skrif Ásgeirs, sem hún kallar lofgjörð um kapítalista.
„Morgunblaðið birtir lofgjörð um kapítalista þar sem því er haldið fram að „Þótt liðin séu nærri 180 ár frá því saga Dickens kom út gætir enn mikils misskilnings um viðhorf Skröggs í peningamálum og hann hafður fyrir rangri sök.“ Dickens var ekkert nema óttalegur auli og öll þau sem lesið hafa Jólaævintýri hans og hrifist af boðskapnum um að gæska og mildi sé farsælast í mannlegum samskiptum enn meiri bjánar. Máli sínu til sönnunar fullyrðir höfundur að ósýnilega höndin klikki ekki. Hvorki meira né minna. Jú, reyndar segir hann frá þeim sem Dickens er talinn hafa byggt persónuna Scrooge á; tveimur vellauðugum vitfirringum sem drusluðust um samtíma sinn í lörfum og týndu upp kolamola af götunum, annar þeirra svo fyrirlitinn af samborgurum sínum að fólk gladdist ægilega þegar hann loksins drapst og grýtti líkkistuna af innilegri andúð. En í veröld höfundar er það ekkert til að hugsa um því að fáráðlingarnir 2 drápust gasalega ríkir og með sjúkri fégræðgi sinni, algjörlega paþólógískri, gerðu þeir mikið gagn.“
Með grein Ásgeirs var mynd AFB-fréttastofunnar af vannærðu barni í Jemen, ásamt textanum:
„Læknar vigta vannært barn í vesturhluta Jemens. Því meiri verðmæti sem við sköpum, því auðveldara eigum við með að hjálpa þeim sem eiga um sárt að binda. Hagnaðurinn verður að koma á undan örlætinu.“
Sólveig staldrar við síðasta punktinn og bendir á að gjarnan græði kapítalistar á stríði og átökum líkt og í Jemen.
„Myndskreyting með jóla-ritgerðinni er svo þessi sem hér sést. Hungrað ungabarn í Jemen, fórnarlamb þeirra skelfilegu átaka sem geisað hafa í 5 ár og gert líf alþýðunnar óbærilegt. „Hagnaðurinn verður að koma á undan örlætinu“ segir í myndatextanum ásamt hvatningu um að gróða-maskínurnar haldi áfram að græða. Og það eru einmitt kapítalistar sem græða á stríðinu í Jemen; Bandaríkin, Bretland, Frakkland, Spánn, Ítalía, Þýskaland eru öll lönd vopnaframleiðanda sem makað hafa krókinn á skelfilegri þjáningu saklauss fólks í Jemen.“
Að lokum segir Sólveig að trú hægrisins á kerfið sé galin, öfgafull og veruleikafirrt. Hún segir að samkvæmt heimssýn Ásgeirs sé gott að vopnaframleiðendur græði á tá og fingri, því þá geti þeir styrkt hjálparsamtök, og fyrir það skuli þakka.
„Trú hægrisins á kerfið er galin. Öfgafull og veruleikafirrt. Samkvæmt trúarritunum sem blaðamaðurinn styðst við er ekkert nema gott að vopnaframleiðendurnir græði afþví að þeir geta þá gefið ölmusu til hjálparstarfs sem sér svo um að gefa þeim sem ekkert eiga teppi og brauðsneið. Kannski fá nokkur börn í Jemen vökva í æð af því að einhver Raytheon stjóri gaf aur til Unicef. Og fyrir það á víst að þakka.“
https://www.facebook.com/solveig.a.jonsdottir/posts/10224506235180925
