Góði hirðirinn, nytjamarkaður SORPU, opnar á fimmtudaginn nýja verslun við Hverfisgötu 94 í miðborg Reykjavíkur. Ekki er um flutning á versluninni að ræða heldur kemur þessi til viðbótar við þá verslun sem lengi hefur verið starfræk í Fellsmúlanum.

Þeir sem búa í miðborginni geta því nú sparað sér sporin og skellt sér á Hverfisgötu í leit af notuðum munum á borð við húsgögn, raftæki, bækur, vínylplötur, smávöru og margt fleira.

„Verslunin er um 300 fermetrar og vöruframboðið þverskurður af því sem hefur verið í boði hjá Góða hirðinum,“ segir Ruth Einarsdóttir, rekstrarstjóri Góða hirðisins. Hún segir eftirspurn eftir notaðri vöru hafa aukist mikið á undanförnum árum með aukinni umhverfisvitund. „Sérstaklega hjá ungu fólki en líka öðrum sem er umhugað um umhverfis- og loftslagsmál,“ segir Ruth.

Hins vegar er sá galli á gjöf Njarðar að verslunin er aðeins tímabundin eða svonefnd uppsprettu-verslun (e. Pop-up) sem sprettur upp í tilefni jólanna. Hins vegar kemur fram í fréttatilkynningu að ef vel gengur er til skoðunar að verslunin fái þar varanlega búsetu.

Á fimmtudaginn mun verslunin við Fellsmúla einnig opna að nýju en hún hefur verið lokuð vegna COVID-19 samkomutakmarkanna.