Fyrirtækið Mountaineers of Iceland hefur vakið mikla athygli í fjölmiðlum í dag eftir að greint var frá því að fyrirtækið hafi flutt 40 manns á Langjökul í gær þrátt fyrir slæmar veðurviðvararnir. Björgunarsveitarmenn þurftu að bjarga fólkinu í gærkvöldi en 300 manns frá sveitinni tóku þátt í björgunaraðgerðunum. Blaðamaður Fréttablaðsins náði tali af starfsmanni fyrirtækisins í morgun en blaðamanninum var sagt að halda kjafti.
Blaðamaðurinn ræddi við Ólaf Tryggvason, leiðsögumann hjá Mountaineers of Iceland, en hann sagði að fyrirtækið vildi ekki tjá sig um málið að svo stöddu. „Ég segi bara nákvæmlega það sem ég er að segja þér. Og hef bara ekkert meira um málið að segja,“ sagði Ólafur. Þá spurði blaðamaður hann hvort það væri réttlætanlegt að fyrirtækið tjáði sig ekki um málið sökum alvarleika þess. „Við erum að skoða það og ég hef ekkert meira um þetta að segja,“ sagði Ólafur við því og skellti síðan á.
Þá hringdi blaðamaðurinn aftur í Ólaf sem ítrekaði að fyrirtækið ætlaði að skoða málið innanhúss. Fyrirtækið vildi ekki tjá sig um málið á meðan staðreyndir þess eru ekki komnar í ljós. Þá sagði Ólafur blaðamanninum að „grjóthalda kjafti“.
Björgunarsveitir af Suður- og Suðvesturlandi voru kallaðar út klukkan 20 í gærkvöldi, en hópurinn hafði farið í skipulagða ferð á vegum ferðaþjónustufyrirtækis um klukkan 13 í gær. Um 300 manns tóku þátt í björgunaraðgerðum á 57 tækjum við mjög erfiðar og krefjandi aðstæður, að því er segir í tilkynningu frá lögreglu.
Björgunarsveitir komu með síðustu ferðamennina í fjöldahjálparstöðina í Gullfosskaffi laust fyrir klukkan 8 í morgun. Enginn reyndist slasaður og er framundan vinna við að koma fólki á hótel sín. „Enn er nokkur fjöldi björgunarmanna ennþá á leið af fjöllum. Veður og færð er enn slæmt og tefur það för þeirra,“ sagði í tilkynningu sem lögreglan á Suðurlandi sendi frá sér í morgun.
