„Ferðabransinn ræður, landamæri opin, við hin tökum höggið,“ skrifaði tónlistarmaðurinn Bubbi Morthens á Twitter-síðu sína í gær. Hann hefur fengið nokkrar athugasemdir við þetta en hefur verið harðorður við þá sem andmæla.

„Útbreiðslan er íslensk. Heimskur Bubbi,“ skrifaði Elías nokkur við tíst Bubba og svaraði Bubbi honum um leið. „Hvaðan kemur þú lúðin þinn? Smyrðu þig með smjölíki, farðu í kalda sturtu, syngdu stál og hnífur 100 sinum og grjóthaltu kjafti,“ sagði Bubbi við Elías.

Tómas Þóroddsson, veitingamaður og veitingahúsaeigandi, svarar einnig Bubba. „Nei Bubbi, hún berst með farandverkamönnum því þú nenntir ekki að vinna lengur í fiski,“ sagði Tómas. Bubbi var einnig harðorður í svari sínu til Tómasar. „Vinur farðu úr bleyjunni syngdu Fatlafól 5 sinnum settu síðan jógúrt á brunasvæðið, þá ætti þér að líða betur og mundu ekki rífa kjaft fyrr en þú ert hættur að vera með bleyju,“ sagði Bubbi við Tómas.

Þessar athugasemdir Bubba vöktu mikla athygli á Twitter. „Bubbi elskar að gjörsamlega pakka fólki saman hérna,“ sagði Siffi nokkur um málið.