Af fréttum af yfirfullum hótelum og tjaldsvæðum að dæma, í hið minnsta sunnantil, er ljóst að Íslendingar hafa verið duglegir að ferðast innanlands þetta sumarið. Hafa þeir sem lagt hafa land undir fót jafnframt verið með eindæmum heppnir með veður og veðurálitsgjafar DV á einu máli um að sumarið hafi bara verið hreint út sagt prýðilegt, hingað til að minnsta kosti.

En nú líður senn að verslunarmannahelgi sem hefur hingað til verið mesta ferðahelgi ársins. Þó er óljóst hvernig hún verður þetta árið, samanborin við aðrar helgar, enda liggur nú fyrir að viðburðir sem á venjulegu ári hafa dregið mikinn fjölda fólks að verða ekki haldnir. Nægir þar að nefna þjóðhátíð sem dæmi.

Veðrið mun svo að sjálfsögðu spila stórt hlutverk, en nú er útlit fyrir úrhellisrigningu um allt land, en þó sérstaklega sunnan og suðvestan til.

Veðurstofan spáir úrhellisrigningu frá fimmtudagskvöldi og í hið minnsta fram á laugardagskvöld. Tekið skal fram að dæmi eru um að langtímaspár er ekki heilagur sannleikur hér á norðanverðu Atlantshafi og geta sjálfsagt tekið breytingum.

Lægð yfir landinu

Veðurfræðingurinn knái Einar Sveinbjörnsson segir í spá sinni á veðurvef sínum, Bliku, að lægðar sé að vænta um verslunarmannahelgina. Segir hann:

Lægðardrög í háloftunum með tilheyrandi kulda sem of oft nær einnig niður til yfirborðs, leiðir til þess að þegar hlýrra loft úr suðvestri reynir að nálgast myndast bara lægð með vindi og úrkomu.  Vitanlega líka hlýrra lofti sem „fýkur“ hér norður yfir.

Einar birtir spákort spá sinni til stuðnings og segir „Lítil bylgja frá Ameríku berst til austurs og með henni sumarhlýtt loft.  þegar hún nálgast nær hún að  „blómstra“ í formi lækkandi loftþrýstings og álitlegrar sumarlægðar.“

Stóru spálíkunin, Evrópska reiknimiðstöðin til vinstri á kortinu og Bandaríska GFS spáin til hægri eru nokkuð samtíga með þessa þróun.  Skil lægðarinnar fara skv. spáinni yfir seint á fimmtudag og snemma á föstudag með hvassri A-átt og rigningu á mest öllu landinu.  Lægðarmiðjan um 985 hPa fylgir síðan í kjölfarið.  Að þessu sinni fylgir nokkuð hlýtt loft á Norður- og Austurlandi á laugardag og jafnvel sunnudag einnig.  Hins vegar gæti blásið því samfara.

Kortin sem Einar vísar í má sjá hér: