Par sem DV talaði við í gærkvöldi er þau voru á leið sinni austur á land sagði það hafa komið þeim stórkostlega á óvart hversu erfitt hafi reynst að bóka herbergi á leiðinni. Parið, sem hugðist skipta akstrinum niður á tvo daga og gista á miðri leið gerði ekki ráðstafanir enda gerðu þau ráð fyrir að öll hótel á landinu væru tóm. Sögðu þau að svo hefði mátt ætla af þjóðfélagsumræðunni undanfarna mánuði.
Það vakti því talsverða undrun þeirra á meðal þegar þau komust að því að nánast ekki eitt einasta hótelherbergi var laust frá Vík í Mýrdal og austur í Lónsöræfi. Eftir að hafa hringt á hvert einasta hótel frá Vík, að Kirkjubæjarklastri og svo austur af fengu þau þó loks inn á hóteli rétt austan við Jökulsárlón. Öll hótel á Höfn í Hornafirði voru uppbókuð.
Nánast ekkert laus herbergi á milli Víkur og Lónsöræfa
mynd/skjáskot google mapsDV sagði frá því í fyrradag að Vík í Mýrdal væri svo til sprungin og þar væri matur að klárast í verslunum. Upp spratt talsverð umræða um þá frétt á samfélagsmiðlum og blandaði forystufólk úr ferðaþjónustunni sér inn í þær umræður. Sögðu þær fréttina villandi þar sem um væri að ræða staka daga hér og þar, frekar en einhverja sumarörtröð. Samt virðist þetta ástand vera hverja einustu helgi víða um land.
Blaðamaður DV reyndi til að mynda að bóka herbergi á Akureyri síðustu helgi. Þá fengust þau svör frá Icelandair Hótel Akureyri að „prófa að hringja á Icelandair Hótel Mývatn, þau gætu átt eitt laust.“
DV reyndi að fá nýtingatölur frá nokkrum völdum hótelum í liðinni viku, en ekkert þeirra vildi gefa þær upp. Enn fremur hefur nokkrum sinnum verið sagt frá því í sumar að tjaldsvæði hafi þurft að vísa fólki frá. M.a. í Skaftafelli núna í júlí, samkvæmt frétt RUV um málið.
Talsverðrar viðkvæmni hefur gætt meðal ferðaþjónustuaðila og svo virðist sem ekki mega tala um hina óvæntu velgengni „ferðumst innanlands“ átaksins. Þykir hann ríma illa við sultartón Samtaka ferðaþjónustunnar, sem keppast nú við að hámarka ríkisaðstoð til greinarinnar og framlengja þær styrktarleiðir sem ríkið hefur þegar ráðist í, að sögn heimildarmanna DV.
Ennfremur má ætla að velgengnin sé viðkvæmt umræðuefni í ljósi þess að ríkið er að greiða launakostnað flestra hótela landsins, ýmist í gegnum hlutabótaleiðina, eða niðurgreiðslu á kostnaði vegna greiðslu launa á uppsagnafresti, en ríkið greiðir fyrirtækjum 85% af launakostnaði fólks á uppsagnarfresti til baka. Kostnaður ríkisins vegna þess er ekki enn hægt að slá fast, en ljóst að hann mun hlaupa á milljörðum. Fólkið sem nú þjónar til borðs á veitingastöðum á landsbyggðinni, býr um rúmið og „chekkar inn“ er margt að vinna sinn uppsagnafrest nú, og þiggur því fyrir þá vinnu, óbeint, laun frá ríkinu.
