Leikhópurinn Lotta, hverfisráð Raufarhafnar og hverfisráð Öxarfjarðar hafa sent frá sér yfirlýsingu vegna máls leikkonunnar Þórdísar Bjarkar Þorfinnsdóttur sem hefur mátt þola harkalegar árásir, netníð og líflátshótanir vegna misskilins brandara um Kópasker og Raufarhöfn.
Í yfirlýsingunni er óskað eftir meira aðgætni og umburðarlyndi í samfélagsumræðunni og að fólk læri af þeim mistökum sem gerð hafa verið. Yfirlýsingin er eftirfarandi:
„Málið sem nú er í umræðunni er okkur öllum þungbært, sem og eftirmálar þess. Við viljum nú gera það sem við getum til þess að lægja öldurnar.
Mikil og góð samskipti hafa átt sér stað milli Leikhópsins Lottu, hlutaðeigandi meðlima hópsins og fulltrúa hverfisráða á Kópaskeri og Raufarhöfn. Það er fullur skilningur á milli okkar allra um að mistök áttu sér stað sem drógu þennan dilk á eftir sér. Málinu er þannig lokið á góðum nótum milli leikhópsins, Þórdísar sjálfrar og hverfisráða svæðanna þó eftirmálar einstakra mála verða að fá að þróast og koma í ljós.
Það er sameiginleg ósk okkar að við öll gætum að okkur í umræðunni, sýnum umburðalyndi og í framhaldinu lærum af þeim mistökum sem gerð hafa verið. Málið er því miður orðið ljótt og andstyggilegt en vonandi getum við stýrt því á þann veg að sem fæst okkar standi sár eftir.
Virðingarfyllst,
Anna Bergljót Thorarensen framkvæmdastjóri Leikhópsins Lottu, Ingibjörg Hanna Sigurðardóttir formaður hverfisráðs Raufarhafnar og Tryggvi Hrafn Sigurðsson formaður hverfisráðs Öxarfjarðar.“
