Fjölmiðillinn OCCRP (Organized Crime and Corruption Reporting Project) birti í gærdag ítarlega frétt um Samherjamálið svokallaða. OCCRP sérhæfir sig í rannsóknarblaðamennsku og fréttafluttningi um spillingu og skipulagða glæpastarfsemi. Miðillinn er hvað þekktastur fyrir aðkomu sína að umfjölluninni um Panama-skjölin. Einnig hefur OCCRP árlega valið persónu ársins sem skammarverðlaun, en sá sem þau hlýtur á að hafa aukið spillingu og/eða skipulagða glæpastarfsemi í heiminum hvað mest.

Líkt og oft hefur komið fram í fjölmiðlum þá er Samherji sakaður um að greiða mútugreiðslur til embættismanna í Namibíu til að komast yfir fiskveiðikvóta. Þá var Samherji einnig vændur um að hafa komið tekjunum af þessum veiðum sínum í Namibíu í skattaskjól, en frétt OCCRP fer nánar út í það.

„A Fishy Business: Shifting Profits Out of Africa“ er heitið á frétt OCCRP. Í henni kemur fram að námu- og olíurisar hafi gjarnan verið sakaðir um svipaða glæpi og þá sem að Samherji er sakaður um, en fullyrt er að fiskurinn sé dýrmætasta náttúruaðlind Afríku.

Fréttin fjallar að miklu leiti um Samherjaskjölin og hvernig þau virðist sýna fram á umfangsmikil skattsvik Samherja, sem eiga að hafa falist í því að færa peninga og selja fisk á milli landa.

Þá er minnst á tölvupóstssamskipti á milli Samherja og lögfræðings í Namibíu. Í þeim póstum sést hvernig Samherji á að hafi óskað eftir hjálp við það að koma ágóða sínum frá Namibíu til Máritíus, eyju sem er þekkt sem skattaskjól. Frá Máritíus á Samherji svo að hafa fært peningana til Kýpur. Vegna þessara flutninga hafi Samherja tekist að selja fiskinn á markaðsverði, en grætt meira en aðrir því að þeir hafi komist algjörlega, eða næstum alveg framhjá því að greiða skatt.

Vitnað er í Nick Branigan, formann rannsóknarstofnunarinnar North Atlantic Fisheries Intelligence Group, sem segir að eflaust tapi þjóðir í Afríku gríðarlegum skattpeningum vegna glæpa tengdum sjávarútvegi. Samkvæmt nýrri rannsókn missa þjóðirnar 1,6 milljarða dollara á ári vegna þessa skattamissis. Branigan telur að talan sé eflaust hærri en það.

Einnig kemur fram að Samherji neiti öllum þessum ásökunum sér á hendur.