Nánast ekkert innanlandssmit kórónuveirunnar er núna hér á landi. Þetta kom fram í máli Þórólfs Guðnasonar sóttvarnalæknis á upplýsingafundi Almannavarna í dag.

Í gær voru tekin sýni úr rúmlega 1.600 farþegum af 3.000 sem komu til landsins. Ekkert virkt smit fannst en tveir eru í bið eftir mótefnamælingu. Frá 15. júní, þegar landamæraskimunin hófst, hafa um 66 þúsund farþegar komið til landsins og 47 þúsund sýni hafa verið tekin. Átján hafa greinst með virkt smit. Af þeim eru átta búsettir á Íslandi, tveir í Danmörku, tveir í Bandaríkjunum og tveir frá Filippseyjum. Einnig eru smitaðir einstaklingar frá Lúxemborg, Albaníu, Póllandi og fleiri löndum.

„Við erum komin með góða reynslu og þekkingu um smithættu af ferðamönnum og vitum hvernig við eigum að verjast veirunni innanlands og á landamærum, þetta þurfum við að nýta okkur á næstu misserum,“ sagði Þórólfur á fundinum.

Ekki er áformað að taka fleiri lönd af áhættulista strax en það verður íhugað um mánaðamótum. Örugg lönd eru nú þegar Þýskaland og Norðurlöndin utan Svíþjóðar, þ.e. Noregur, Danmörk, Finnland, Færeyjar og Grænland.

Þórólfur sagði að við stæðum á krossgötum í dag, sérstaklega ef litið er til þess hvernig faraldurinn er erlendis. Aldrei hafa fleiri greinst daglega og nú um stundir. Útbreiðslan er breytileg á milli landa og jafnvel innan þeirra. „Þessi faraldur er ekki á undanhaldi í heiminum nema síður sé og engan veginn hægt að segja hvenær honum muni ljúka,“ sagði Þórólfur.

Hann segir mikilvægt að breyta vinnulagi á þann hátt að við horfum til lengri tíma í stað þess að beita krísustjórnun. Við þurfum að tileinka okkur nýja hugsun og margir að koma að því borði hvernig við tökumst á við veiruna á næstu mánuðum og misserum. Þar þarf í senn að huga að sóttvarnaröryggi og finna leiðir til að efla efnahag landsins. Þórólfur tók fram að það síðarnefnda væri ekki hlutverk sóttvarnalæknis, en margir þyrftu að koma að þessu borði.