Laust fyrir miðnætti í gærkvöld fékk lögregla tilkynningu um mann með hníf við skemmtistað í miðborginni. Reyndi maðurinn að veitast að öðrum manni. Er lögregla kom á vettvang reyndi maðurinn að komast undan en lögreglumenn yfirbuguðu hann og beitti varnarúða. Maðurinn var vistaður í fangaklefa.
Þetta kemur fram í dagbók Lögreglunnar á höfuðborgarsvæðinu. Alls voru 88 mál bókuð frá kl. 17 í gær til kl. 5 í morgun og að sögn lögreglu var þó nokkur erill. Milli tíu og tuttugu útköll voru vegna kvartana um hávaða í heimahúsum.
Laust fyrir kl. 18 var farsíma stolið úr afgreiðslu í fyrirtæki í borginni. Starfsmenn eltu þjófinn uppi og skömmu síðar handtók lögregla hann. Reyndist hann vera með aðra muni í vörslu sinni sem hann gat ekki gert grein fyrir, talið vera þýfi. Maðurinn var vistaður í fangaklefa.
Maður var sleginn með glasi í höfuðið á skemmtistað í Hafnarfirði. Gerandinn var farinn af vettvangi þegar lögregla kom.
Nokkrar fleiri líkamsárásir eru tilgreindar, sem og innbrot, en upplýsingar um þau mál eru mjög takmarkaðar.
