Emmsjé Gauti, sem gefur út plötuna ,,Bleikt Ský” á morgun, er í viðtali hjá Sölva Tryggvasyni í nýjasta podcasti Sölva. Í viðtalinu ræða Sölvi og Gauti meðal annars um fíkniefni og áfengi. Sjálfur er Gauti hættur að drekka og segir að það hafi hjálpað honum mjög við að losna við kvíða að hætta að drekka áfengi, sem sé sterkara efni en flestir geri sér grein fyrir.

,,Ég ákvað að kæla flöskuna og ég hef ekki fengið kvíðakast síðan,“ segir Gauti í viðtalinu við Sölva.

Varðandi áfengið og ástæðu þess að það sé ekki sett undir sama hatt og fíkniefni segir hann:

,,Við erum meira og minna öll háð þessu efni á einhvern átt og viljum þess vegna ekki að þetta sé tekið af okkur.”

Gauti er með sterkar skoðanir á því að enn sé horft á fíkniefnaneytendur sem glæpamenn en ekki veikt fólk. Það sé löngu úrelt að eiga við hlutina með þessum hætti og ástæðan fyrir því að svo mikill greinarmunur sé gerður á áfengi og öðrum efnum sé fyrst og fremst vegna þess að áfengi sé samfélagslega viðurkennt og fólk sé háð því með einum eða öðrum hætti.

,,Ég sé ekki rökin í því að leyfa áfengi en vera síðan í harðri baráttu gegn kannabisefnum. I don´t get it,” segir Gauti meðal annars í viðtalinu. Hann bætir við að hann neyti í dag hvorki kannabisefna né áfengis.

Hann tekur það skýrt fram að hann sé alls ekki hrifinn af fíkniefnum, en er algjörlega sannfærður um að glæpavæðing efnanna sé löngu úrelt leið til þess að eiga við vandann.

Í viðtalinu ræða Sölvi og Gauti meðal annars um tónlistina, kvíðatímabilið sem Gauti gekk í gegnum, trúarbrögð, guð og skoðanakúgun. Útgáfutónleikar Gauta eru 18. júlí.

Viðtal Sölva við Gauta má sjá hér:

https://www.youtube.com/watch?v=R-SBg9ZmbdY&t=29s