Lögreglunni á Suðurnesjum barst í gær tilkynning um búðarhnupl í verslun í Njarðvík. Þegar lögreglu bar að garði var hinn grunaði enn á svæðinu. Í tilkynningu segir.

„Hinn fingralangi aðili var enn í versluninni þegar lögreglumenn komu á vettvang. Hafði viðkomandi hnuplað nokkrum hlutu,, þar á meðal barnapúðri og barnaolíu, og viðurkenndi verknaðinn við gerð vettvangsskýrslu.“ 

Í tilkynningu kemur enn fremur fram að í gærkvöldi hafi lögreglan handtekið ökumann sem hafði neitt fjögurra tegunda af fíkniefnum að því er sýnatökur bentu til. Játaði hann athæfið við skýrslutöku.

Lögregla handtók einnig eftirlýstan karlmann sem átti að færa fyrir dóm. Hann var með meint fíkniefni í dós sem hann henti frá sér viðhandtökuna. Eins hafði lögregla afskipti af tveimur ökumönnum sem voru ökuréttindalausir og sjö ökumenn voru kærðir fyrir hraðakstur.

Lögreglu barst svo tilkynning í vikunni um innbrot í bílskúr. Hinn grunaði braut rúðu til að komast inn en græddi aðeins lítilræði af peningum á verknaðinum.