Maður var þann 10. júní sakfelldur í Héraðsdómi Reykjaness fyrir ofbeldi gegn sambýliskonu sinni. Atvikið átti sér stað þann 25. júlí 2019 á þáverandi heimili fólksins.

Maðurinn var reiður konunni vegna, að hans sögn, ónógs kynlífs í sambandinu. Var hann sakaður um að hafa snúið upp á hægri úlnlið henanr, slegið hana með viskustykki í bakið og gripið  með báðum höndum um háls hennar þannig að henni lá við köfnun. Konan hlaut við þetta mar á hægri úlnlið og punktablæðingar á hálsi með byrjandi mari. Auk þess var hún með klórför hægra megin á baki.

Maðurinn var ákærður fyrir heimilisofbeldi og fyrir brot gegn barnaverndarlögum þar sem ung dóttir hjónanna var sögð hafa horft á ofbeldið. Því neitaði ákærði og sagði barnið hafa verið sofandi í barnavagni á meðan atvikið átti sér stað.

Maðurinn var sakfelldur fyrir líkamsárás en taldist hvorki sekur um brot gegn barnaverndarlögum né um heimilisofbeldi. Taldist brot hans ekki samrýmast því sem stendur í 218. gr. hegningarlaga um heimilisofbeldi, en þar segir:

„Hver sem endurtekið eða á alvarlegan hátt ógnar lífi, heilsu eða velferð núverandi eða fyrrverandi maka síns eða sambúðaraðila, niðja síns eða niðja núverandi eða fyrrverandi maka síns eða sambúðaraðila, áa síns, eða annarra sem búa með honum á heimili eða eru í hans umsjá, með ofbeldi, hótunum, frelsissviptingu, nauðung eða á annan hátt, skal sæta fangelsi allt að 6 árum.“

Þá þótti ósannað að barnið hefði orðið vitni að ofbeldinu.

Maðurinn var dæmdur í tveggja mánaða skilorðsbundið fangelsi. Hann var dæmdur til að greiða helming sakarkostnaðar, tæplega hálfa milljón króna.