Inga Sæland, formaður Flokks fólksins, segist hugsi yfir fréttum dagsins um að bókaverslunin Eymundsson hafi tekið allar nýjar bækur útgáfunnar Uglu úr sölu sökum þess að Ugla hefur látið lesa bækur sínar inn sem hljóðbækur.

Sjá einnig: Bókaútgefandi ber Eymundsson þungum sökum

Þetta kom fram í ræðu Ingu á Alþingi í dag undir liðnum Störf þingsins. Þar skoraði Inga á þingið að fylgjast vel með þessu mái enda væri það alvarlegt að fyrirtæki í markaðsráðandi stöðu beitti sér með þessum hætti.

„Í Morgunblaðinu í dag má lesa frétt sem gerir mig verulega hugsi. Það kemur fram að stærsta bókaverslanakeðja landsins, Penninn/Eymundsson, hefur tekið allar nýjar bækur Bókaútgáfunnar Uglu úr sölu og endursent þær útgáfunni. Þetta gerist umorðalaust og án nokkurra viðvarana. Jakob Ásgeirsson útgefandi og eigandi Uglu segir að Eymundsson geri þetta til að refsa sér fyrir að hafa látið lesa bækur sínar inn sem hljóðbækur og streymt þeim til hlustunar á netinu. Slíkt hafa margar útgáfur gert að undanförnu. Mikil og vaxandi eftirspurn virðist eftir slíku hjá neytendum, það fólki sem hlustar á hljóðbækur, og er ég í þeim hópi enda með mjög skerta sjón.

Inga bendir á að jafnvel þó forstjóri Eymundsson hafi hafnað skýringum Uglu á því að bækurnar væru teknar úr sölu þá sé samt um athugaverð málsatvik að ræða sem þurfi að fylgjast með.

„Mjög alvarlegt ef að markaðsráðandi fyrirtæki í miðlun prentmáls eigi að geta haft sína hentisemi um það hvaða bækur hann bjóði til sölu. […]

Fyrirtæki sem fá að njóta markaðsráðandi stöðu eiga að hafa samfélagslegar skyldur. Svona gera menn bara ekki, það er að ráðast á litla útgáfu sem hefur staðið sig mjög vel og meðal annars gefið út margar perlur heimsbókmenntanna á undanförnum árum. Fyrir utan þetta þá er það ótækt ef rétt reynist að fákeppnisrisi á markaði reyni með svona hætti að stýra aðgengi neytenda að tilteknum vörutegundum, í þessu tilfelli hljóðbókum í streymi á netinu. Við sem löggjafi hér á hinu háa Alþingi, eigum að fylgjast grannt með þessu máli.“