Maður sem talinn er hafa logið því að hann hafi fallið í Ölfusá er laus úr haldi lögreglu. Maðurinn er talinn hafa hringt í lögreglu með þessar fölsku upplýsingar og síðan fylgst með björgunaraðgerðum við Ölfusá úr felum. Var maðurinn handtekinn í gærkvöld og gisti fangageymslur í nótt.

Í nýrri tilkynningu frá Lögreglunni á Suðurlandi um málið segir:

„Rúmlega tvítugur karlmaður sem handtekinn var í nótt vegna útkalls að Ölfusá hefur verið látinn laus úr haldi lögreglu. Hann kannaðist við að hafa hringt eftir aðstoð lögreglu vegna málsins og gaf sínar skýringar á útkallinu. Málið telst upplýst og fer nú sína leið til ákæruvalds til ákvörðunar um framhald þess.“