1. maí verður sögulegur í ár. Í tæpa heila öld hafa kröfugöngur verið fastur liður á baráttudegi verkalýðsins en kröfugangan nú fer fram á samfélagsmiðlum. DV ræddi við forkólfa í verkalýðshreyfingunni um stóru málin í baráttunni í tilefni dagsins.
Engin kröfuganga verður haldin þetta árið í tilefni af alþjóðlegum baráttudegi verkalýðsins þar sem samkomubann er í gildi vegna COVID-19. Þess í stað stendur verkalýðshreyfingin fyrir baráttu- og skemmtidag- skrá á RÚV í kvöld undir yfirskriftinni: Byggjum réttlátt þjóðfélag. Þá hafa ASÍ, BSRB, BHM og KÍ sameinast í átaki á samfélagsmiðlum og standa öll að Facebook-síðunni 1. maí Ísland. Þar er til að mynda hægt að sækja sérstakan ramma til að merkja prófílmyndina sína á Facebook og gera hana að rafrænu kröfu- spjaldi.
Drífa Snædal telur að þó að 1. maí verði óhefðbundinn í ár þá takist jafnvel að ná til enn fleiri hópa. „Við erum ekki bara að leggja áherslu á sjónvarpsútsendinguna heldur líka samfélagsmiðlana í meiri mæli en hefur áður verið gert. Það getur því vel farið svo að við náum betur til fólks af öllum kynslóðum en áður,“ segir Drífa.
Þórunn Sveinbjarnardóttir er spennt fyrir sjónvarpsútsendingunni. „Þetta verður auðvitað allt öðruvísi en venjulega og við sem tökum þátt í útsendingunni þurfum að reyna að koma stemningunni til skila og ég vona að það takist vel. Ég vona líka að allt launafólk geti fagnað deginum með fjölskyldu sinni, með hæfilegu bili þó, og að þessu sinni tökum við bara gamla Ísland á þetta og komum öll saman fyrir framan Ríkis- sjónvarpið,“ segir Þórunn.
Sonja Ýr Þorbergsdóttir vonar að samfélagið finni fyrir því sterka baklandi sem verkalýðshreyfingin er. „Eitt af því jákvæða sem maður hefur fundið á síðustu vikum er þessi sterka samstaða sem hefur skapast þó að fólk nái ekki að hittast í eigin persónu. Ég vona að við náum að skapa þannig andrúmsloft á þessum degi jafnvel þó að við getum ekki haft kröfugöngur eins og venjulega,“ segir hún.
Ragnar Þór Pétursson bendir á að það sé misjafnt eftir þjóðum hvort 1. maí sé há- tíðisdagur eða baráttudagur, og að á Íslandi hafi dagurinn frekar snúist um baráttu hjá fólki. „Þessi dagur nú verður skrýtinn eins og allt er skrýtið. Baráttan fyrir bættu samfélagi og bættum lífskjörum má aldrei verða stofnun heldur þarf að halda henni lifandi. Þá er áhugavert að það mæta yfirleitt miklu fleiri til að borða rjómatertur á 1. maí en fara í kröfugöngu.“
Viðtalið er hluti af stærri umfjöllum sem birtist í tilefni af 1. maí í nýju helgarblaði DV.
