Þorbjörg Marinósdóttir hefur verið ráðin nýr ritstjóri DV en Samkeppniseftirlitið samþykkti í liðinni viku kaup útgáfufélagsins Torgs á DV, dv.is og tengdum miðlum. Þorbjörg, eða Tobba eins og hún er kölluð, kemur til starfa á næstu vikum og segir verkefnið vera gríðarlega spennandi.

„Ég hlakka til að takast á við að ritstýra DV og dv.is. Netmiðillinn ásamt undirmiðlunum er einn sá fjölsóttasti hér á landi og nú tekur við að laga þar  til í efnisvali og efnistökum. Við viljum að hann sé léttur og skemmtilegur miðill sem segi harðar féttir í bland en sé umfram allt með vönduð efnistök. DV hefur undanfarið verið gefið út í pappír á föstudögum og því verður haldið áfram. Þar eru mikil tækifæri, að gefa út fjölbreytt helgarblað með fréttum í bland við vandað afþreyingarefni,“ segir Tobba. Hún segir að ristjórnarstefna DV verði nú löguð að ritstjórnarstefnu Torgs, sem felur óhjákvæmilega í sér nokkrar breytingar. „Þegar við höfum hrundið breytingunum í framkvæmd er vonin sú að fólk muni sjá breytt blað og breyttan vef með ferskum áherslum. Virðing fyrir viðmælendum er mikilvæg og við munum leggja áherslu á það,“ segir hún.

Jóhanna Helga Viðarsdóttir, forstjóri Torgs, tekur í sama streng. „Við erum afskaplega lukkuleg með að fá Þorbjörgu til liðs okkur hjá við Torgi. Hún er með víðtæka reynslu úr heimi fjölmiðla og hefur verið kraftmikill stjórnandi í fyrri störfum. Þá er hún með skýra sýn varðandi hvernig fjölmiðil Torg hefur hug á að gefa út undir merkjum DV. Við bjóðum hana hjartanlega velkomna til starfa.“

Þorbjörg er fjölmiðlafræðingur að mennt og með mastersgráðu í verkefnastjórnun. Hún hefur einnig skrifað fjölda bóka, stýrt sjónvarpsþáttum, starfað í útvarpi og á fjölmiðlum svo sem Séð og Heyrt, SkjáEinum þar sem hún sat í framkvæmdastjórn og Morgunblaðinu.

Hlé verður nú gert á útgáfu DV í pappírsformi meðan unnið er að breytingum útlits og efnistaka og stefnt að útgáfu nýs og öflugra DV á allra næstunni. Ekkert hlé verður á starfsemi dv.is og undirvefja þess.