Í tilkynningu frá Drífu Snædal, formanns ASÍ, kemur fram sú skoðun sambandsins að fólk sem neyðist til að vera heima vegna COVID-19 veirunnar, t.d. vegna sóttvíar, eigi að halda launum sínum. Tilkynningin er eftirfarandi:

COVID-19 og fjarvistir frá vinnu

Að gefnu tilefni vill Alþýðusamband Íslands taka fram, að launafólk sem sett er í sóttkví eða sem gert er að læknisráði að halda sig heima við og umgangast ekki vinnufélaga eða annað fólk í umhverfi sínu vegna þess það sé annað af tvennu sýkt af COVID-19 eða sé hugsanlegir smitberar hans, er að mati ASÍ óvinnufært vegna sjúkdóms eða vegna hættu á því að verða óvinnufært vegna hans. Þau forföll eru greiðsluskyld skv. ákvæðum kjarasamninga og laga.

Miðstjórn ASÍ mun fjalla um þá stöðu sem upp er komin og viðbrögð við henni á fundi sínum nk. miðvikudag.