Karlmaður á fimmtugsaldri sem grunaður er um að hafa stungið annan í heimahúsi á Kópaskeri liggur nú á gjörgæslu. Var hann fluttur þangað rænulítill úr fangageymslu lögreglunnar í gær. Því hefur lögregla ekki náð að yfirheyra hann vegna málsins.

Samkvæmt sjónarvotti var mikill viðbúnaður við fangelsið á Akureyri í gær.

„Mikill viðbúnaður var hérna við fangelsið á akureyri, þrír sjúkrabílar þar af einn hjartasjúkrabíll og læknabíll frá heilsugæslunni. Það voru borin inn allskonar tæki og tól, hjartastuðtæki, önnur raftæki og töskur og voru þeir þar fyrir utan með blikkandi ljós í um klukkustund þar til einn karlmaður var borin út á börum.“

Samkvæmt tilkynningu frá lögreglu er brotaþoli árásarinnar enn á gjörgæslu og ekki hefur verið unnt að taka af honum skýrslu.

Rannsókn málsins er enn á frumstigi og liggja málsatvik ekki ljós fyrir. Tvennt annað var handtekið vegna málsins, maður og kona, sem voru í haldi lögreglu en voru látin laus í gærkvöldi. Eru þau ekki talin tengjast árásinni.

Vettvangsrannsókn tæknideildar lögreglunnar á Höfuðborgarsvæðinu stendur nú yfir á vettvangi á Kópaskeri og reiknar lögregla með að henni ljúki í dag.