Fyrsta kvikmynd Jóhanns Jóhannssonar heitins, Last and First Men, þar sem hann gegndi hlutverki leikstjóra og handritshöfundar auk tónskálds, var frumsýnd á kvikmyndahátíðinni í Berlín á dögunum og fékk hlýjar viðtökur. Jóhann var að leggja lokahönd á myndina þegar hann lést þann 9. febrúar árið 2018 en verkið er byggt á samnefndri vísindaskáldsögu eftir Olaf Stapledon og fjallar um mannkyn framtíðar. Vefmiðillinn IndieWire segir verkið vera einhverja frumlegustu vísindaskáldsögumynd síðari ára og hafa aðrir fjölmiðlar tekið í sama streng af fyrstu viðbrögðum að dæma.