Karlmaður á fimmtugsaldri er í haldi lögreglu, grunaður um að hafa stungið annan mann með hníf í heimahúsi á Kópaskeri í gærkvöldi.

Lögreglan á Norðurlandi eystra var kölluð út um níu leytið í gær vegna hnífsstungu. Árásin átti sér stað í heimahúsi og er meintur árásarmaður talinn hafa brotið sér leið inn í heimahús og ráðist þar að manni og valdið honum alvarlegum áverkum. Kona sem einnig var stödd í húsinu tilkynnti atvikið. Þegar lögreglu bar að garði var árásarmaðurinn á bak og burt.

Slæmt veður var á þessum tíma og vegir ófærir. Sérsveit ríkislögreglustjóra var kölluð á vettvang og flutt þangað með þyrlu og starfsmenn Vegagerðarinnar voru kallaðir út til að opna lögreglu leið eftir veginum. Sá slasaði var fluttur með þyrlu á sjúkrahúsið á Akureyri þar sem hann er nú á gjörgæslu, en líðan hans er sögð stöðug.

Meintur gerandi var handtekinn í nótt, en um er að ræða karlmann á fimmtugsaldri. Tvennt annað var handtekið vegna málsisn og flutt í fangageymslu.

Samkvæmt tilkynningu frá lögreglu er ljóst að málsaðilar voru ekki allsgáðir.