Af þeim 49 einstaklingum sem settir voru í sóttkví í gær, vegna umgengni þeirra við íslenska manninn sem greindur hefur verið með kórónaveiruna, voru tekin sýni úr 24 einstaklingum. Nú liggur niðurstaða þeirra prófanna fyrir og reyndust öll sýnin neikvæð fyrir veirunni. Mbl.is greindi frá.

Ekki þótti þörf á að taka sýni úr öðrum einstaklingum heldur aðeins úr þeim sem uppfylltu tiltekin skilyrði um mögulegt smit.

Samtals eru nú 81 í sóttkví, en enginn hefur bæst við frá því i gær. Stór hópur Íslendinga lenti um 17:00 á Keflavíkurflugvelli, en þau eru að koma frá Verona Ítalíu. Um borð voru 180 Íslendingar. Þessir aðilar munu fá upplýsingar frá áhöfn flugvélarinnar um almenna smitgát ásamt upplýsingum um símanúmerið 1700 sem fólkinu er ráðlagt að hringja í finni það fyrir einkennum veirunnar – hósti,hiti,beinverkir og mæði- Nokkur viðbúnaður var á vellinum en lögreglumenn og heilbrigðisstarfsmenn tóku á móti fólkinu til að veita þeim frekari ráðleggingar.