Fyrsti Íslendingurinn sem greinst hefur með COVID-19 veiruna var í skíðaferð á Ítalíu með eiginkonu og dóttur og vinafólki. Hann er á fimmtugsaldri og fór utan 15. febrúar og kom heim aftur 22. febrúar.

Hann veiktist nokkrum dögum eftir heimkomuna og leitaði lækninga á Landspítalanum. Sýnataka var í gær og veiran greindist í sýninu í dag.

Þetta kom fram á blaðamannafundi Landlæknisembættisins og Embættis sóttvarnalæknis sem nú stendur yfir.

Maðurinn er ekki alvarlega veikur en er með fremur væg öndunareinkenni. Eiginkona hans og dóttir hans hafa einnig verið rannsökuð, sem og vinafólk í ferðinni.

Maðurinn er í einangrun á smitsjúkdómadeild Landspítalans.

Fram kom í máli Ölmu Möller, landlæknis, að nú væri unnið að því að finna þá einstaklinga sem greinst hafa með veiruna. Hún benti á að 80% þeirra sem veikjast séu einkennalitlir en 5% veikist alvarlega, en flestir þeirra fá lungnabólgu.

Alma segir að íslenskt heilbrigðiskerfi hefði undanfarna mánuði verið að búa sig undir komu veirunnar. Heilsugæslan um land allt væri þar í framlínu. Þeir sem eru mögulega smitaðir skulu hringja í síma 1700 og í kjölfar símtals er metið hvort beita eigi sýnatöku, senda í sóttkví eða einangrun.

Þess má geta að maðurinn og fjölskylda hans eru sögð hafa tekið tíðindunum af miklu æðruleysi og veittu greiðlega upplýsingar.