„Ég ætla ekki að tjá mig sérstaklega um niðurstöðu Héraðsdóms Vesturlands í þessu riftunarmáli, enda bara fyrri hálfleikur að baki og líklegt að endanleg niðurstaða fáist ekki fyrr en eftir eitt eða tvö ár. Því tek ég æðruleysið á þetta og treysti því að niðurstaðan á endanum verði önnur,“ segir fjölmiðlamaðurinn Björn Ingi Hrafnsson í opinni yfirlýsingu á Facebook-síðu sinni, en Björn Ingi var í dag dæmdur í Héraðsdómi Vesturlands til að greiða þrotabúi Pressunnar 80 milljónir króna.

Björn Ingi deilir frétt RÚV um dóminn og segir enn fremur:

„Vísa annars til þess sem Sveinn Andri Sveinsson, lögmaður minn, segir í þessari frétt, sem er að það komi ekki annað til greina en að dómnum verði áfrýjað. „Þessi dómur kemur okkur á óvart efnislega. Dómarinn horfir algjörlega framhjá frásögnum fyrrverandi starfsmanna sem greindu frá lánveitingum Björns til Pressunnar. Við teljum að dómurinn byggi á misskilningi á staðreyndum og útúrsnúningum.““