Drengirnir voru allir 16 ára gamlir þegar árásin átti sér stað í september árið 2017 fyrir utan matsölustaðinn Ungó í Reykjanesbæ. Brotaþolinn hlaut smávægilega ytri áverka af árás piltanna, vægt mar og bólgu við vinstra auga og mjög vægt skrámusár á vinstra hné. Auk þess var hann greindur með þreifieymsl, að því er fram kemur í dómi
Eins og áður segir þá var árásin tekin upp á myndband. Myndbandið er einungis 49 sekúndur að lengd en í dómnum segir að í því megi greinilega sjá tvo þeirra ákærðu ráðast á brotaþolann. Allir drengirnir neituðu þó sök en enginn drengjanna kvaðst þekkja sig á upptökunni. Dómurinn mat þó framburð þeirra ótrúverðugan.
Þá er einnig sagt frá því að einn þeirra ákærðu hafi fengið greitt fyrir barsmíðarnar. „Hvar er þúsundkadlinn minn?“ á hann að hafa sagt eftir að hann kýldi brotaþolann í andlitið auk þess sem hann er sagður hafa montað sig af því að hafa fengið greitt fyrir höggið.
Allir drengirnir voru dæmdir í skilorðsbundið fangelsi. Einn drengjanna var dæmdur í tveggja mánaða fangelsi en hinir voru allir dæmdir í eins mánaðar fangelsi. Þá voru þeir einnig dæmdir til að greiða brotaþola 400 þúsund krónur ásamt því að borga réttargæslumanni brotaþola rúmlega 400 þúsund krónur.
