Ágúst Ólafur Ágústsson, þingmaður Samfylkingarinnar, komst í hann krappann þegar hann varð bensínlaus rétt áður en hann kom að bensínstöð einni. Nú stendur yfir kjördæmavika á Alþingi og segir Ágúst að þá geti ýmislegt gerst.
„En að vera bensínlaus bókstaflega 5 metrum frá bensíndælunni er nýtt fyrir mér. En björgunarliðið var ekki af verri endanum en hálft Gettu betur lið Menntaskólans í Reykjavík kom eins og kallað og ýtti mér þessa metra. Augljóslega ekki bara andleg stórmenni þar á ferð. Annars verður áhugaverð keppni í kvöld þegar MR mætir Kvennó. Tvö stórveldi þar á ferð en auðvitað mun MR vinna þetta,“ segir Ágúst en hann varð stúdent frá MR árið 1997.
