Jón Ólafur Björgvinsson hefur hótað lögbanni á fræga og rómaða bók Páls Baldvins Baldvinssonar, „Síldarárin 1867 – 1969“. Bókin er mikil að vöxtum og var tilnefnd til Íslensku bókmenntaverðlaunanna. Jón Ólafur hefur skrifað mikið um síldarárin á vefinn siglo.is og segir hann Pál Baldvin hafa leitað grimmt í smiðju sína án þess að geta heimilda. Telur hann Páll Baldvin hafa vegið að höfundarrétti sínum og vill bókina úr dreifingu.

Greint er frá málinu á vefnum Trölli.is og birt kröfubréf lögmanna Jóns til Forlagsins. Bréfið er stílað á Egil Örn Jóhannsson, framkvæmdastjóra Forlagsins. Þar segir meðal annars:

Þar sem umbj. minn telur skýrlega vegið að höfundarrétti sínum er þess krafist að dreifingu bókarinnar verði hætt þegar í stað og af henni verði látið þar til sátt kemst á í málinu.

Verði erindi þessu ekki svarað og dreifingu bókarinnar ekki sannanlega hætt fyrir þann 7. febrúar næstkomandi má eiga von á frekari aðgerðum til fullnustu á rétti umbj. míns, þ.á.m. að farið verði fram á lögbann á dreifingu bókarinnar. Er réttur til skaða- og miskabóta jafnframt að fullu áskilinn.