Fæðingatíðni hefur náð nýjum lægðum á Íslandi, í Noregi og Finnlandi, þrátt fyrir að Norðurlöndin státi af einu besta fæðingarorlofskerfi í heiminum, einkum hvað viðkemur feðrum. Þetta er meðal þess sem kemur fram í nýrri skýrslu um stöðu Norðurlanda sem var gefin út í vikunni á vegum norrænu ráðherranefndarinnar. Útlit er fyrir að samfélög á Norðurlöndunum haldi áfram að eldast á næstu árum. Í skýrslunni kemur fram að nú þurfi Norðurlöndin að horfast í augu við þessa stöðu og skipuleggja sig eftir henni. Meðal þess sem Norðurlöndin ættu að taka tillit til er að styðja við lýðheilsu eldri borgara og skapa hagfelldari búsetuaðstæður og -umhverfi. Til dæmis með því að styrkja búsetuúrræði, almenningssamgöngur og umhverfisskipulag svo það henti betur eldri samfélagsþegnum.

Fæðingartíðni á Íslandi hefur minnkað úr 2,2 börnum á hverja konu, eins og var árið 2009, niður í 1,7.  Eins hefur meðalaldur kvenna sem eiga sitt fyrsta barn hækkað.

Númer fjögur í lífsgæðum

Í skýrslunni kemur einnig fram að Ísland sé í fjórða sæti Norðurlandanna þegar kemur að lífsgæðum. Lífsgæðin eru mæld í skýrslunni með kvarða sem miðar við þrjá þætti; lífslíkur frá fæðingu, þekkingu mælda í lengd skólagöngu og lífsgæðum út frá vergri landsframleiðslu.

Ísland kemur vel út þegar kemur að andlegri heilsu. Þar erum við undir Evrópumeðaltali, en 16,7% Íslendinga eru talin glíma við andlega kvilla á meðan meðaltalið í Evrópu er 17,3%.

Um 78% Íslendinga á aldrinum 25–64 ára hafa lokið námi umfram skólaskyldu. En það er töluvert yfir Evrópumeðaltalinu sem er 67,1%. Erum við þó í neðsta sæti hinna Norðurlandanna sem öll eru með yfir 80 prósent.

Losun gróðurhúsalofttegunda

Losun gróðurhúsalofttegunda jókst á Íslandi á árunum 1990–2017, það sama á við um Noreg. Á öðrum Norðurlöndum dró úr losun. Er þetta talið skýrast af gasiðnaði í Noregi og áliðnaðinum á Íslandi.