Afskipti voru höfð af pari sem skellti sér í heita pottinn í Suðurbæjarlaug í Hafnarfirði í nótt í leyfisleysi og banni. Þau eiga von á kæru fyrir sundferðina, segir í tilkynningu lögreglu.

Nóttin var almennt erilsöm hjá lögreglunni á höfuðborgarsvæðinu, mikið var um útköll þar sem fólk var í annarlegu ástandi og voru alls 75 mál skráð síðan um fimm leytið í gærdag. Nokkuð var um umferðaóhöpp vegna hálku sem myndaðist á höfuðborgarsvæðinu en engin slys urðu í þessum óhöppum. Þá voru nokkrir ökumenn stöðvaðir þar sem þeir voru undir áhrifum áfengis og eða fíkniefna.

Tilkynnt um mjög ölvaðan mann í hverfi 112 þar sem hann var að reyna að komast inn í hús í hverfinu, þegar rætt var við hann kom í ljós að hann átti heima í næsta nágrenni en sökum vímuástands gerði hann sér ekki grein fyrir staðsetningu sinni. Honum fylgt heim til sín þar sem tekið var á móti honum.

Tveir menn voru handteknir í hverfi 105 vegna líkamsárásar og var annar þeirra vistaður í fangageymslu þar sem ekki var hægt að yfirheyra hann sökum ölvunar en hinn var látinn laus að lokinni skýrslutöku. Tilkynnt um bílveltu í Hvalfirði, engin meiðsli á fólki en bifreiðin óökufær eftir veltuna.