Enginn einstaklingur hefur greinst með kórónaveiruna á Íslandi en tíu einstaklingar hafa þó verið rannsakaðir með tilliti veirunnar. Enginn reyndist smitaður.

Þetta kemur fram í stöðuskýrslu almannavarnadeildar ríkislögreglustjóra vegna kórónaveirunnar. Í morgun voru staðfest smit orðin 31.503 og þar af höfðu um 638 einstaklingar dáið. Öll dauðsföllin hafa orðið í Kína fyrir utan eitt sem varð á Filippseyjum.

Á stöðufundi sóttvarnalæknis með áhöfn samhæfingarstöðar almannavarna í morgun var rætt um áframhaldandi aðgerðir hér á landi og leiðir til að koma í veg fyrir að veiran berist hingað til lands.

Þá segir í skýrslunni að sóttvarnalæknir muni í dag eiga fund með Samtökum atvinnulífsins þar sem ræddar verða viðbragðsáætlanir fyrirtækja varðandi órofinn rekstur.

Haldinn var samráðsfundur með umdæmislæknum sóttvarna og lögreglustjóra allra umdæma, en á fundinum var meðal annars rætt hvernig mögulegt er að herða aðgerðir á Keflavíkurflugvelli og á öðrum alþjóðaflugvöllum hér á landi, til að koma í veg fyrir að veiran berist hingað til lands. Ákveðið var að yfirvöld á Keflavíkurflugvelli í samvinnu almannavarnadeild ríkislögreglustjóra kanni betur öll möguleg úrræði á vellinum til að lágmarka áhættuna á því að veiran berist hingað til lands.