Matvælastofnun barst á laugardag tilkynning frá Arctic Sea Farm um gat á nótarpoka einnar sjókvíar fyrirtækisins við Eyrarhlíð í Dýrafirði.
Í tilkynningu Matvælastofnunar kemur fram að gatið hafi uppgötvast við neðansjávareftirlit og er viðgerð lokið. „Samkvæmt upplýsingum Arctic Sea Farm var gatið um 99 cm rifa á 20 m dýpi. Í þessari tilteknu kví voru um 170.000 laxar með meðalþyngd 2,4 kg. Neðansjávareftirlit var áður framkvæmt 22. janúar sl. og var nótarpoki þá heill,“ að því er fram kemur í tilkynningunni.
Þá segir að eftirlitsmaður Matvælastofnunar hafi skoðað aðstæður og viðbrögð fyrirtækisins og er atvikið til meðferðar hjá stofnuninni. „Arctic Sea Farm lagði út net í samráði við Fiskistofu til að kanna hvort strok hafi átt sér stað. Netanna var vitjað bæði á sunnudag og mánudag og enginn lax veiddist og hefur veiðiaðgerðum verið hætt.“
