Enginn einstaklingur hefur enn sem komið er greinst með kórónaveiruna á Íslandi. Tvö sýni voru þó prófuð hér á landi um helgina, á laugardag og sunnudag, og reyndust þau bæði neikvæð. Í stöðuskýrslu almannavarna vegna kórónaveirunnar kemur fram að ekki hafi reynst sterkur grunur um smit, en próf til að greina kórónaveiruna eru nú komin í notkun á sýkingavarnadeild Landspítalans.

Í skýrslunni kemur fram að sóttvarnarlæknir og almannavarnardeild ríkislögreglustjóra hafi fundað í morgun. Á fundinum var rætt um áframhaldandi aðgerðir og leiðir til að koma í veg fyrir að veiran berist hingað til lands.

„Ekki virðist vera aukning á nýgengi veirunnar erlendis, sem er jákvætt og einkennalausir einstaklingar virðast ekki smita. Nauðsynlegt er að samfélagið allt sé virkjað í aðstæðum sem þessum, atvinnulíf og stofnanir uppfæri sínar viðbragðsáætlanir og séu viðbúnar ef veiran berst hingað til lands með margvíslegum afleiðingum,“ segir í skýrslunni.

Þá er áfram unnið að upplýsingamiðlun í gegnum margvíslegar leiðir, s.s. símatextaskilaboð, dreifibréf og veggspjöld. Ferðaþjónustan og Safe travel miðlar efni til ferðamanna.

„Mikil áhersla er á að ná til einstaklinga sem hafa tengingu við Wuhan eða Kína og eru með einkenni í öndunarfærum. Ekki er mælt með að skima of snemma fyrir veirunni þar sem sýni eru ekki talin marktæk, ef þau eru tekin of snemma.“

Þeim tilmælum er svo beint til fólks að ef grunur vaknar um tilfelli skuli hringja í Læknavaktina í síma 1700 (fyrir erlend símanúmar +354 544-4113) þar sem veittar eru upplýsingar um hvernig á að nálgast heilbrigðiskerfið. Einstaklingar eru sérstaklega beðnir um að mæta ekki á bráðamóttöku sjúkrahúsa eða á heilsugæslustöðvar nema að fengnum ráðleggingum í síma.