„Þessi dæmi sýna hvað það skiptir gríðarlegu máli fyrir íslensk heimili að halda verðbólgunni niðri og sérstaklega í ljósi þess að stórhluti fjárskuldbindinga heimila og einstaklinga eru verðtryggðar,“ segir Vilhjálmur Birgisson, formaður Verkalýðsfélags Akraness og 1. varaforseti ASÍ.

Eins og greint var frá í gær lækkaði verðbólga um 0,74 prósent á milli mánaða og er tólf mánaða verðbólgan nú 1,7 prósent. Vilhjálmur bendir á að verðbólgan nú sé ein sú lægsta á Norðurlöndunum um þessar mundir.

Verðbólga getur haft mikil áhrif á verðtryggðar skuldir; ef hún hækkar hækka til dæmis verðtryggð lán og ef hún lækkar þá lækka verðtryggðu lánin. Vilhjálmur rekur þetta nánar í færslu á Facebook.

„En hvað þýðir þetta fyrir verðtryggðar skuldir íslenskra heimila? Jú, bara í síðasta mánuði má áætla að verðtryggðar skuldir íslenskra heimila hafi lækkað um 13,3 milljarða, og ef ég man rétt þá nema verðtryggðar skuldir heimilanna um 1800 milljörðum,“ segir hann og þrengir dæmið enn frekar niður.

„Til að setja þetta niður að heimili sem skuldar 30 milljóna verðtryggt þá mun slíkt húsnæðislán lækka um 222 þúsund á einum mánuði vegna lækkunar verðbólgunnar á milli mánaða,“ segir Vilhjálmur sem ítrekað hefur mikilvægi þess að halda verðbólgu í skefjum og afnema verðtrygginguna.