Mette Yvonne Larsen, réttargæslumaður Elenu Undeland í morðmálinu í Mehamn, Noregi, trúir því ekki að andlát Gísla Þórs Þórarinssonar hafi verið slys. Frá þessu greinir mbl.is. 

Ekki slys

Elenda Undeland er barnsmóðir Gunnars Jóhanns Gunnarssonar og var kærasta bróður hans, Gísla Þórs, sem Gunnar hefur verið ákærður fyrir að myrða.

Verjandi Gunnars hefur gagnrýnt að ákært sé fyrir morð af ásetningi þar sem augljóst sé að um slys var að ræða. Gunnar hafi aldrei ætlað að bana bróður sínum.

Þessu er Larsen ósammála.

„Hann segir að um slys hafi verið að ræða sem mér þykir býsna erfitt að leggja trúnað á. Að kalla það slys þegar þú kemur hem til bróður þíns, reiður út í hann og með hlaðið skotvopn. Þá máttu einfaldlega reikna með því að eitthvað gerist. Þú kemur ekki með hlaðið skotvopn ef þú ætlar ekki að gera neitt,“ hefur mbl.is eftir Larsen.

Ólíðandi að rödd hans fái að heyrast

Larsen gagnrýnir einnig að Gunnar hafi haft aðgang að samfélagsmiðlum á borð við Facebook á meðan hann sat í gæsluvarðhaldi.

„Hann hefur fengið einhvern til að fara inn á Facebook síðu hans og aðra samfélagsmiðla og birta þar efni og myndir sem hefur verið skjólstæðingi mínum ákaflega þungbært. Hann á ekki að hafa aðgang að þessum miðlum úr fangelsi og það er ólíðandi að rödd hans fái að heyrast þar.“

Réttarhöldin yfir Gunnari munu hefjast í lok mars.