Íslensk kona á Suðurlandi þurfti að greiða rúmlega 80 þúsund krónur fyrir læknisvottorð hjá Heilbrigiðisstofnun Suðurlands, sökum ráðlegginga sem hún fékk frá Tryggingastofnun.
Þetta kemur fram í tilkynningu frá Öryrkjabandalagi Íslands.
Konan er með 75% örorkumat frá Tryggingastofnun og hafði búið um hríð í Danmörku. Tryggingastofnun benti henni á að hún gæti mögulega átt rétt á lífeyrisgreiðslum úr danska lífeyriskerfinu og ráðlögðu konunni að sækja rétt sinn til systurstofnunar TR í Danmörku, Udbetaling Danmark.
Tryggingastofnun hafði svo milligöngu um umsókn hennar og sendu fyrir hana vottorð. Danska stofnunin vildi þó ítarlegra vottorð. Konan leitaði því til Heilbrigðisstofnunar Suðurlands og hitti þar heimilislækni sinn. Viðtalið sjálft við lækninn tók rétt rúmlega korter og aldrei minntist læknirinn á kostnað vegna vottorðsins.
Í framhaldinu fékk konan tilkynningu um að vottorðið sé tilbúið. Hún sækir það til heilbrigðisstofnunar Suðurlands, en er ekki rukkuð jafnóðum. Sendi hún svo vottorðið til Danmörku. Mánuði síðar er henni tilkynnt að hún þurfi að greiða rúmlega 80 þúsund krónur til að fá vottorðið afhent.
„Upphæðin kom henni skiljanlega á óvart. Hún leitaði því liðsinnis ÖBÍ, hvort hún þurfi virkilega að greiða svona mikið fyrir læknisvottorð. Vottorðið var vissulega ítarlegt, upp á 4 síður, en unnið að mestu upp úr fyrirliggjandi gögnum. “
Samkvæmt gjaldskrá Heilbrigðisstofnunar Suðurlands, sem birt er á heimasíðu þeirra, er vottorð vegna örorku gjaldfrjálst og hæsta tilgreinda verð vegna læknisvottorðs er tilgreint 5.750 krónur vegna byssuleyfa, skóla og sumarbúða erlendis og vegna atvinnutengdra réttinda.
„Það er því óskiljanlegt með hvaða rökum stofnunin telur sig geta rukkað viðkomandi um þetta háa fjárhæð fyrir læknisvottorð,“ segir í tilkynningu.
ÖBÍ leitaði skýringa frá Heilbrigðisstofnun Suðurlands og fékk upplýsingar um að konan gæti átt rétt á að sækja um kostnaðinn endurgreiddan til TR. Starfsmaður TR greindi ÖBÍ þó frá því að þarna virðist um heldur háa upphæð að ræða.
„Óljóst er hvort konan fái alla upphæðina endurgreidda, eða aðeins að hluta.“
Samkvæmt tilkynningu ÖBÍ hafa þeir leitað skýringar frá Heilbrigðisstofnun Suðurlands á þessu háa gjaldi. En engin svör hafa borist, þrátt fyrir ítrekaðar beiðnir.
