Maður einn, búsettur í Reykjavík, hefur verið sakfelldur fyrir þjófnaði og fleiri brot, fyrir Héraðsdómi Vesturland. Málið var dómtekið þann 20. janúar.

Manninum er meðal ananrs gefið að sök að hafa í október síðastliðinum brotist inn í bíl á Akranesi og stolið loftpressu úr honum.

Um svipað leyti stal maðurinn bíl við Barónstíg í Reykjavík og keyrði um borgina og landið á bílnum.

Manninum er enn fremur gefið að sök að hafa ekið bíl á röngum skráningarnúmerum og hann sjálfur þá undir áhrifum ólöglegra fíkniefna. Meðal annars fannst amfetamín í blóði hans.

Maðurinn játaði brot sín skýlaust og var það virt honum til refsilækkunar. Hann hefur hlotið fimm aðra refsidóma frá árinu 2015, meðal annars fyrir þjófnaði og líkamsárás. Voru fyrri brot reiknuð honum til refsiauka.

Maðurinn var dæmdur í þriggja mánaða fangelsi. Hann er sviptur ökuréttindum ævilangt og dæmdur til að greiða tæplega 120.000 í málskostnað.