29 ára gamall Breiðhyltingur, Bruno Ivan de Jesus Pereira, hefur verið ákærður fyrir sérlega hrottafulla og hættulega líkamsárás sem á að hafa átt sér stað aðfaranótt miðvikudagsins 11. október árið 2017, utandyra við skemmtistaðinn Moe´s Grill við Jafnasel 6 í Breiðholti.

DV hefur ákæru héraðssaksóknara í málinu undir höndum en það verður þingfest næstu daga fyrir Héraðsdómi Reykjavíkur. Meintur þolandi Brunos er fertugur maður og á Bruno, samkvæmt ákæru, að hafa kastað í hann poka með óopnuðum bjórdósum, slegið hann í höfuðið með járnröri og slegið með eða kastað múrsteini í höfuð hans. Þolandinn er sagður hafa hlotið X-laga opinn skurð í hársverði við efsta hluta ennisbeins, náði skurðurinn í gegnum höfuðleður og þurfti að sauma hann með 14 sporum. Þá hlaut þolandinn innankúpublæðingu og sprungu í ennisbeini.

Ákæruvaldið krefst þess að Bruno verði dæmdur til refsingar og greiðslu alls sakarkostnaðar.

Þolandinn höfðar einkaréttarkröfu á Bruno og krefst 3,5 milljóna króna í miskabætur auk málskostnaðar.