Um kl. 14:00 í gær varð árekstur milli lögreglubíls sem ekið var af Klausturvegi á Kirkjubæjarklaustri inn á hringtorg, þar sem Klausturvegur tengist Suðurlandsvegi, og jeppa sem ekið var vestur Suðurlandsveg og öfugu megin inn í hringtorgið.  Svo virðist sem ökumaður jeppans, sem er erlendur ferðamaður, hafi misst stjórn á bílnum þegar hann nálgaðist hringtorgið og lent öfugu megin við umferðareyju sem skilur að akstursstefnur og síðan beint framan á lögreglubílinn.   Lögreglumaðurinn, sem var einn á ferð, var fluttur til aðhlynningar á sjúkrahús en útskrifaður þaðan í gærkvöldi og talinn óbrotinn en töluvert marinn.   Ökumaður og farþegi jeppans sluppu ómeidd.

Þetta kemur fram í tilkynningu frá Lögreglunni á Suðurlandi þar sem farið er yfir helstu verkefni liðinnar viku.

Þar segir einnig frá því að lögregla og sjúkraflutningamenn voru kölluð til að sveitabæ í Rangárvallasýslu í gær þegar skot hljóp úr fjárbyssu í framhandlegg manns sem var að aðstoða þann sem á byssunni hélt við að aflífa kind. Kúlan mun hafa setið eftir í handleggnum og var maðurinn fluttur til aðhlynningar á sjúkrahúsi í Reykjavík.