Tvær hollenskar konur voru dæmdar til fangelsisvistar í Héraðsdómi Reykjaness í gær fyrir að smygla miklu magni af kókaíni til landsins í lok ágústmánaðar 2019. Konurnar heita Carmen Julis Frederica og Isaura Maribel Romero Eusebio.
Konurnar fluttu samtals rúmlega eitt kíló af kókaíni. Fluttu þær fíkniefnin með flugi frá Brussel í Belgíu til Keflavíkurflugvallar. Isaura var með meirihlutann af efnunum falinn innvortis í líkama sínum en Carmen faldi um fjórðung af efnunum í nærbuxum og innvortis.
Báðar játuðu brot sín. Isaua bar við að eftir að hún hafði fengið fregnir af því að móðir hennar væri alvarlega veik hafi hún í örvæntingu tekið ákvörðun um að flytja fíkniefni til landsins og afla þannig fjár til að hjálpa móður sinni í veikindunum. Í dómnum segir í framhaldi af þessu: „Ákærða kvaðst hafa greint meðákærðu Carmen frá veikind um móður sinnar og samhliða upplýst meðákærðu um að hún hefði hitt aðila sem boðið hefði henni að flytja fíkniefni til Íslands gegn greiðslu 2.5 00 evra. Meðákærða hefði sjálf verið í fjárhagsvandræðum og hún þess vegna ákveðið að taka þátt í fíkniefnainnflutningnum,án þess að ákærða bæði hana um það.“
Konurnar voru báðar sakfelldar. Isaura fékk 15 mánaða fangelsisdóm og Carmen 6 mánaða dóm. Til frádráttar refsingunni kemur gæsluvarðhald frá 30. ágúst 2019. Báðar þurfa að greiða verjendum sínum nokkuð háar fjárhæðir, Isaura rúmlega 1.100 þúsund krónur og Camen 365 þúsund.
