Magnús Stefán Jónasson, fyrrverandi forseti bæjarstjórnar í Fjallabyggð, hefur verið ákærður fyrir stórfelldan fjárdrátt, umboðssvik og peningaþvætti, í starfi sínu sem skrifstofustjóri sparisjóðsins Afls á Siglufirði, á árunum 2009-2010. Málið kom upp árið 2015 eftir rannsóknir sérstaks saksóknara. Var Magnús þá handtekinn ásamt fleiri mönnum. Ákæra gegn honum var hins vegar ekki gefin út fyrr en í apríl á þessu ári en málflutningur í málinu verður í Héraðsdómi Norðurlands eystra næstkomandi mánudag.

DV hefur ákæruna undir höndum og er hún í mörgum liðum. Meint misferli varðar fjármuni sem eru yfir 50 milljónir króna. Stór hluti af meintum afbrotum snúast um fjárhagslegan ávinning byggingaverktakafyrirtækisins Bás á kostnað sparisjóðsins Afls, með meintum ólögmætum millifærslum yfir á reikninga Bás og afskriftum skulda fyrirtækisins við Afl.

Magnús er einnig ákærður fyrir fjárdrátt yfir á eigin reikninga og fyrir ólögmæta ráðstöfun á söluandvirði véla og tækja í sjávarútvegi en þar er um að ræða að sölu á lyfturum, þvottakari og fiskvinnsluvél.

Magnús er ennfremur ákærður fyrir umboðssvik með því að hafa misnotað aðstöðu sína og stefnt fjármunum sparisjóðsins Afls í verulega hættu með heimildarlausu ótryggðu láni í formi yfirdráttarheimildar upp á 5 milljónir.

Magnús er einnig ákærður fyrir peningaþvætti með því að hafa tekið við og umbreytt ávinningi af refsiverðri háttsemi úr reiðufé í bankainnstæðu með því að taka við og leggja inn á sinn bankareikning samtals 10,5 milljónir króna í tveimur innlögnum. Féð var ávinningur af refsiverðum brotum.

Krafist er þess að Magnús verði dæmdur til refsingar og til greiðslu alls sakarkostnaðar. Enn fremur er krafist upptöku á eignum Magnúsar í formi bankainnistæðna og að bankareikningar hans verði haldlagðir.