Aðeins einn glæpasagnahöfundur fær starfslaun rithöfunda í ár, Jónína Leósdóttir, sem fær sex mánaða laun. Nokkur umræða hefur verið um það undanfarin ár að krimmahöfundar séu ekki í náðinni hjá úthlutunarnefndum starfslauna. Ólíklegt er að þrír vinsælustu krimmahöfundar landsins hafi sótt um starfslaun, Arnaldur, Yrsa og Ragnar Jónasson, þau tvö fyrrnefndu vegna hárra tekna af bóksölu, og Ragnar tæpast þar sem hann er í mjög vel launuðu starfi.

En fjarvera fjölmargra annarra nafna á listanum vekur athygli. Þær Lilja Sigurðardóttir og Sólveig Pálsdóttir hafa til dæmis verið mjög afkastamiklir krimmahöfundar undanfarin ár og Lilja kemur líklega næst Ragnari Jónassyni í vinsældum.

Stefán Máni, sem er einn af vinsælustu höfundum landsins, er ekki heldur á listanum, en hann hefur raunar lýst því yfir að hann sé hættur að sækja um eftir stöðugar hafnanir undanfarin ár.

Að minnsta kosti tveir fantasíuhöfundar eru á starfslaunalistanum og ef dæma á af því njóta fantasíur meiri virðingar en hefðbundnar glæpasögur hjá úthlutunarnefnd starfslauna rithöfunda.