Lögreglumaður á Selfossi kemur fyrir Héraðsdóm Suðurlands á fimmtudag en þá verður tekið fyrir mál ákæruvaldsins gegn honum. Er honum gefið að sök að hafa sýnt mikla vanrækslu í starfi er hann á að hafa látið undir höfuð leggjast að gera fíkniefni upptæk og framkvæma fíkniefnaleit.

Maðurinn framkvæmdi leit í húsnæði í Hveragerði miðvikudagskvöldið 22. maí síðastliðinn. Þar var kannabisblandaður vökvi í potti á eldavél. Honum er gefið að sök að hafa látið undir höfuð leggjast að gera kannabisvökvann upptækan, sem og að hafa vanrækt að gera frekari leit að fíkniefnum í húsnæðinu. Þar reyndust vera hátt í 2 kíló af kannabisefnum auk 1.700 millilítra af kannabisblönduðum vökva. Efnin fundust daginn eftir.

Í ákæru segir að lögreglumaðurinn hafi gerst sekur um stórfellda vanrækslu og hirðuleysi í starfi. Er þess krafist að hann verið dæmdur til refsingar og greiðslu alls sakarkostnaðar.

Saksóknari í málinu er Kolbrún Benediktsdóttir varahéraðssaksóknari.