Um hádegi í dag rakst Rakel nokkur á hænuna Hildi sem var á vappi í kringum Laugardalinn. Hún tók mynd af hænunni og lýsti eftir eiganda hennar á samfélagsmiðlinum Facebook. „Þessi er í stuði á Langholtsvegi/nálægt Laugarásvegi (finnst greinilega skemmtilegast úti á miðri götu). Hún veldur umferðarteppu þegar hún stoppar makindalega og kroppar í götuna til að skoða malbiksskemmdir,“ segir hún og bætir við að hænan kippti sér ekkert upp við bílaflaut.
Um fjögur leytið í dag greinir Þóra nokkur frá því að 5. bekkur í Langholtsskóla hafi rekist á hænuna á leið sinni heim úr vettvangsferð. Kennari í hópnum ákvað að rölta í Húsdýragarðinn til að koma henni í öruggt skjól. Vífill Sigurðsson, eigandi hænunnar, komst að því að hún væri komin í Húsdýragarðinn. Vífill gat ekki sótt Hildi sjálfur þar sem hann er fastur í Noregi en sonur hans hætti fyrr í vinnunni til að sækja hana fyrir hann.
En hænan var ekki heil á húfi þegar sonur hans mætti í Húsdýragarðinn. „Ég er fastur úti í Osló. Strákurinn minn skaust eftir vinnu og þá var bara búið að drepa hana,“ segir Vífill í samtali við DV. „Það var ekki liðinn nema klukkutími frá því að hún mætti í garðinn. Hún var bara tekin og drepin um leið.“
Hænan Hildur var orðinn 8 ára gömul en Vífill fékk hana í fimmtugsafmælisgjöf. Hann segir hana hafa oft áður villst úr garðinum. „Þetta eru kannski ekki gáfuðustu fuglar í heiminum en hún hefur alltaf komið aftur heim,“ segir Vífill en honum þykir þetta vera ótrúlega leiðinlegt.
Þorkell Heiðarsson, deildarstjóri Fjölskuldu- og húsdýragarðsins, segir í samtali við blaðamann að ekkert rangt hafi verið gert af þeirra hálfu í málinu. Hænan hafi verið kvalin þegar hún kom í garðinn og því var hún tekin af lífi. „Hún var nú eiginlega bara við það að drepast, hún hafði lent í einhverjum ósköpum,“ segir Þorkell. „Við getum sagt að hún hafi verið nær dauða en lífi. Það er ekki eins og við höfum verið að taka lífið af heillri hænu.“
