Lögum um leigubílakstur verður breytt í vor ef frumvarp sem Sigurður Ingi Jóhannsson samgönguráðherra lagði fram á Alþingi í desember verður samþykkt. Mjög verður slakað á reglum er varðar leyfisveitingar til leigubílaksturs. Til dæmis verður ekki nauðsynlegt að starfrækja leigubílastöð, fjöldaatakmarkanir varðandi starfsleyfi verða lagðar af og lágmarks vinnuskylda leigubílstjóra verður afnumin. Samtök leigubílstjóra óttast að breytingarnar skerði mjög þjónustu og rústi afkomumöguleikum leigubílstjóra sem hafa starfað lengi í faginu.

Fjallað var um málið í Morgunblaðinu í dag en frumvarpið má sjá hér og umsögn Bandalags íslenskra leigubílstjóra og Bifreiðastjórafélagsins Fram um frumvarpið er hér.

Markmið nýju laganna er að auka frelsi á leigubílamarkaðnum og tryggja örugga og góða þjónustu fyrir notendur leigubíla. Auk ofangreindra breytinga minnka kröfur til þeirra sem fá leyfi til aksturs. Ekki verður nauðsynlegt að fyrir leigubílstjóra að starfa á leigubílastöð til að starfrækja leigubíl.

Í umsögn sinni benda samtök leigubílstjóra á að afleiðingar af rýmkum reglna um leigubílaakstur í Finnlandi séu slæmar. Segja samtökin nauðsynlegt að innleiða breytingarnar í þrepum en ekki allar í einu svo ekki hljótist af óafturkræfur skaði. Þá vara samtökin mjög við því að slakað verði á vinnuskyldu leigubílstjóra því það geti leitt til þess að nýir aðilar keppi við bílstjóra sem hafa verið lengi á markaðnum um vænlegustu tækifærin en sinni ekki þjónustu þar sem er minni eftirspurn. Þannig verði bæði afkomu gróinna bílstjóra og þjónustu við almenning stefnt í hættu.

Samtökin vara við farveitur á borð við Uber og segja um starfsemi þeirra erlendis:

„…það eru til langir listar yfir misferli þeirra og verið er að leggja bann við þeim í sífellt fleiri borgum og ríkjum fyrir óheiðarlega samkeppni, svart hagkerfi, ofbeldi, hærri slysatíðni og svo lengi má telja. Vitað er til þess að farveitur hækki verðlag eftir því sem eftirspurnin eykst. Þá viljum við benda á þann útbreidda vanda sem fylgir farveitunum, að þeir bílstjórar sem starfa í gegnum snallforrit, taka auk þess ferðir af götunni, án þess að þær hafi verið skráðar inn í kerfið við upphaf ferðar. Þetta er yfirstandandi óöryggi viðskiptavina í þeim löndum þar sem slík þjónusta starfar.“