Gamlárskvöld gengur senn í garð, með tilheyrandi sprengingum og látum, en ekki eru allir jafn hrifnir af slíku, og allra síst gæludýrin okkar.

Í tilkynningu frá Matvælastofnun er gæludýraeigendur minntir á að huga vel að dýrum sínum meðan á flugeldaskotum stendur um áramótin.

Meðal annars er bent á að halda köttum alveg inni dagana í kringum áramót og hafa hunda alltaf í taumi þegar þeim er hleypt út, þótt það sé bara út í garð.

Dýr sem sýna mikla hræðslu ber ekki að skilja eftir ein, en fram kemur að misjafnt sé hvort hrædd gæludýr vilji félagsskap eigandans eða hvort þau vilji skríða í felur. Ef þeim líður betur í felum skal maður leyfa þeim það. Allra mikilvægast er að dýrin sleppi ekki út.

Þá er gott er að tala rólega en glaðlega við dýrin og jafnvel er hægt að gefa þeim smá dýranammi og þá er bent á að strokur og snerting eiganda rói einnig flest dýr og veiti þeim styrk.

Ef framangreint er ekki talið nægjanlegt, þá er gæludýraeigendum ráðlagt að tala við dýralækni tímanlega fyrir áramót og fá ráðleggingar. Hægt er að fá lyfseðil fyrir kvíðadempandi lyf .

Ungum dýrum, sem eru að upplifa sín fyrstu áramót, þarf að sýna sérstaka aðgát. Dagarnir fyrir áramót geta gefið vísbendingu um hvers megi vænta.

„Allra mikilvægast er alltaf að dýrin séu í öruggu umhverfi og njóti stuðnings eiganda sinna,“ segir jafnframt í tilkynningu MAST.