Maður í annarlegu ástandi var handtekinn í Breiðholti 109 í gærkvöldi. Maðurinn var á nærbuxunum einum fata, blóðugur á höndum eftir að hafa brotið rúðu og var búinn að ryðjast inn í íbúð hjá ókunnugum. Maðurinn var vistaður fyrir rannsókn máls í fangageymslu lögreglu.

Þetta kemur fram í dagbók lögreglu en einnig barst tilkynning um eignaspjöll í Árbæjarskóla í hverfi 110. Alls fimm rúður voru brotnar.

Einnig var maður í annarlegu ástandi handtekinn í hverfi 101. Umræddur maður var grunaður um eignaspjöll og þjófnað en hann var vistaður fyrir rannsókn máls í fangageymslu lögreglu.

Nokkrir ökumenn voru stöðvaðir í gærkvöld og í nótt. Tveir voru undir áhrifum áfengis eða fíkniefna, tveir óku alltof hratt, einn fór yfir á rauðu ljósi og annar var á númerslausum bíl. Síðasti ökumaðurinn var án ökuréttinda, sem hann hefur aldrei öðlast, en að sögn lögreglu er þetta ekki í fyrsta skipti sem hann er tekinn við akstur.